الجمعة، 17 مارس، 2017

مجرد شهوة


- اظن ان شهوة الكلام المفروض تتحط اول شهوة في ترتيب الشهوات ، للاسف الشهوة دي عندي منعدمة بقدر كبير ، و كاي شهوة لما بتحاول تعملها محاكاه بتقتل متعتها و بيبان عجزك فيها ، عشان كده على طول ساكت و بتوصف بالبرود. 
- اخر شات كان بيني و بين البنت اللي ارتبط بيها قالت كلام كتير بس كل اللي فاكره انها قالتلى انت ممل ، اكتر حاجه ضيقتني في حياتي كانت الكلمة دي ، مش عشان اخدتها على انها إهانه بس كشفتني قدام نفسي و مش عجبنى اللي شفته . 
- السادية حالة من عدم الاتزان النفسي بيستمتع فيها الشخص بأذية اللي حواليه و استحقاره ، على حسب معلوماتى عن علم النفس انه غالباً الحالة دي بتحصل لما الشخص يتعرض لإهانه و تعذيب جسدي في فتره في حياته ، بس اللي اكتشفته ان التعذيب النفسي له نفس التأثير  ، في فتره بعد الأنفصال بحكم اني وحيد و حياتى الإجتماعية محصلتها صفر ، كنت برجع للعلاقة تاني مع اني عارف انه غلط بكل مقاييس الانسانية ، بس كان احسن من الوحدة ، بس لما قررت اني مش هرجع تاني الموضوع كان صعب ، ساعتها قررت اني همنع نفسي بكل الطرق ، حاربت كل رغبة جوايا اني ارجع عذبت نفسي و منعتها عن حاجات كتير عشان مش ارجع ، و للاسف قلب معايا باني بقيت بميل للسادية . 
- بالمناسبة انا بكره اتكلم في الموبايل ، و برد على 3 مكالمات من كل  10 مكالمات ، و ده مسبب ليا ازمة مع ناس كتير بس مفيش حد هيفهم ان ده غصب عني. 
-  الاغنية دي ( Evanescence - Lithium ) فيها كوبليه معبر جدا .. 
" Darling, I forgive you after all
Anything is better than to be alone
And in the end I guess I had to fall
Always find my place among the ashes " 

ليست هناك تعليقات:

إرسال تعليق